Vorveiðin í Hörgá hefst í dag 1.maí á svæðum 1 og 2. Eingöngu er leyfð fluguveiði á þessum tíma og sleppiskylda er á fiski. Fyrir félagsmenn er hálfur dagur seldur á 3500 kr. Góða skemmtun á bakkanum.

Aðalfundi SVAK er lokið en hann var haldinn í Deiglunni í kvöld.

Nýja stjórn skipa:

Guðrún Una Jónsdóttir formaður

Jón Bragi Gunnarsson

Anna Kristveig Arnardóttir

Stefàn Gunnarsson

Valgerður Jónsdóttir

Varamenn; 

Guðmundur Ármann Sigurjónsson

Benjamín Þorri Bergsson

Formanninn dreymir um að fá fleiri veiðisvæði fyrir félagsmenn SVAK og saknar þess að veiðisvæði fari ekki í útboð. Hún vill sjá fleira ungt fólk ánetjast stangveiðinni og stefnir á að stofna kvennaklúbb til að fá fleiri konur í sportið. Baráttan við sjókvíaeldi á laxi heldur áfram og að vekja athygli á hnignun sjóbleikjunnar sem hefur farið fækkandi undanfarin ár og vill hertari aðgerðir á netaveiði í sjó og aukna kvóta í ánum. SVAK stefnir á öflugt félagslíf nú loksins þegar covidpestin er á undanhaldi og hefur þegar haldið 3 kastæfingar á síðustu vikum. Fyrsti fundur með nýrri stjórn verður haldinn fljótlega og línurnar lagðar fyrir veiðisumari 2022.

Gleðilegt sumar kæru stangveiðiunnendur ! 
Minnum á kastæfinguna við Leirutjörn í dag milli kl 11 og 13. Endilega kíkið á okkur í góða veðrinu, æfið ykkur að kasta eða bara skiptist á nokkrum góðum veiðisögum og njótið veðurblíðunnar. Kakó að hætti Kiddu ásamt meðlæti til að dýfa í.

Mikil eftirspurn hefur verið eftir kastkennslu í vor. Við héldum tvær kastæfingar í Íþróttahúsinu á Hrafnagili sem voru vel sóttar. Nú færum við okkur út í vorblíðuna og ætlum að hittast við Leirutjörn á Sumardaginn fyrsta kl 11 og liðka okkur ennfrekar í fluguköstum. Endilega komið með stangirnar ykkar og æfið ykkur. Leiðbeinendur á staðnum. Veðurspáin lofar góðu, tveir metrar á sekúndu,12 gráður í plús og heiðskýrt. Boðið verður uppá hressingu á milli kasta. 

Bleikjan – Styðjum stofninn eru nýstofnuð félagasamtök sem hafa það að markmiði að gæta hagsmuna sjóbleikju og meta aðgerðir til að styrkja stofninn.

Í samstarfi við Stangaveiðifélag Akureyrar (SVAK), Veiðifélögin í Eyjafirði og Fiskirannsóknir ehf verður haldin opinn fundur um málefnið.

Staðsetning er Deiglan í Gilinu á Akureyri og hefst fundurinn kl 20.

Þar verður stiklað á stóru um þá þætti sem teljast vera orsakavaldar hnignunarinnar og hvað er til ráða.

Fundarstjóri er Sigmundur Ófeigsson en mælandur verða Högni Harðarson hjá Fiskirannsóknum ehf og Stefán Einar Sigmundsson verkfræðingur hjá Höldi

Boðið verður upp á kaffiveitingar

Aðalfundur Stangveiðifélags Akureyrar verður haldinn þriðjudaginn 26.apríl kl 20 í Deiglunni við Kaupvangsstræti.

Dagskrá fundarins verður eftirfarandi:

1. Kosning fundarstjóra og fundarritara 
2. Formaður flytur skýrslu stjórnar 
3. Farið yfir ársreikning félagsins og hann lagður fram til samþykktar 
4. Umræður um ofangreint 
5. Fundarhlé, veitingar
6. Kosningar í stjórn og varastjórn ásamt skoðunarmönnum reikninga.
7. Önnur mál 

Hörgá fer í forsölu til félagsmanna SVAK 12.apríl kl 20 og stendur tl 19.apríl.

Hörgá er skemmtileg og fjölbreytt á með 7 veiðisvæðum þar sem er veitt á 2 stangir á hverju svæði.  Nánar má lesa um Hörgá hér https://svak.is/info/horga

Veiðitímabilið hefst 1.maí á svæðum 1 og 2 og er eingöngu leyfð fluguveiði á þeim svæðum til 20 júní og skal öllum fiski sleppt fram að því. 

Önnur svæði árinnar opna 20.júní. Svæði 4b, 5a og 5b loka 10. september en neðri svæði (1, 2, 3 og 4a) eru opin út september. 

Veiða má að hámarki 3 bleikjur á stöng á vakt á svæðum 1,2,3,4a,4b og 5 a. Þessar takmarkanir eiga ekki við urriða, sjóbirting eða lax. Á þessum svæðum má nota allt löglegt agn, að undanskilinni vorveiði þar sem eingöngu má nota flugu eins og kemur fram hér að ofan. Á svæði 5b verður áfram eingöngu leyfð fluguveiði en nú skal allri bleikju sleppt á því svæði. 

Veiðileyfasala SVAK fram á heimasíðu félagsins. Ef þú hefur ekki keypt leyfi hjá okkur áður þarftu að fara inn í nýskráning til þess að skrá þig inní kerfið.

Gleðilegar stundir á bakkanum

Eftir langar og strangar samkomutakmarkanir er nú loksins komið að því að hittast á opnu húsi.

Bleikjan – Styðjum stofninn eru nýstofnuð félagssamtök sem hafa  það að markmiði að gæta hagsmuna sjóbleikju og meta aðgerðir til að styrkja stofninn. 

Í samstarfi við Stangaveiðifélag Akureyrar (SVAK), Veiðifélögin í Eyjafirði og Fiskirannsóknir ehf verður haldin opinn fundur um málefnið 19. apríl næstkomandi. 

Staðsetning er Deiglan í Gilinu á Akureyri og hefst fundurinn kl. 20:00. 

Þar verður stiklað á stóru um þá þætti sem teljast vera orsakavaldar hnignunarinnar og hvað er til ráða. Fundarstjóri er Sigmundur Ófeigsson en mælendur verða Högni Harðarson hjá Fiskirannsóknum ehf og Stefán Sigmundsson. 

Vonumst til að sjá sem flesta.

Veitingar í boði.

Minnum á kastæfinguna í dag laugardagí íþróttahúsinu Hrafnagili milli kl 12 og 14.

Sjáumst

Kveðja 

Stjórnin

Ágætu félagsmenn SVAK

Hraunssvæðin í Laxá í Aðaldal fara í forsölu til félagsmanna SVAK fimmtudaginn 31.mars kl 20 og stendur forsalan til 7.apríl.

Hraun er mjög skemmtilegt fjölskyldusvæði með mikilli náttúrufegurð og frábært þurrflugusvæði.

Veiðitími er frá 1. júní – 31. ágúst. Svæðið er selt í hálfum dögum. 

Veitt frá kl 7-13 og 16-22 en eftir 5. ágúst frá kl 7-13 og 15-21.

Veitt er á 2 stangir á Efra-Hrauni og 2 stangir á Neðra-Hrauni.

Eingöngu er leyfð fluguveiði 

Kvótinn er 2 fiskar á dag á stöng og skylt er að sleppa öllu yfir 40 cm. 

Öllum laxi skal sleppt aftur án undantekninga.  Særist lax svo honum verði ekki hugað líf ber að koma honum til landeiganda.

Vor og veiðikveðjur

Stjórn SVAK

Ágætu félagar SVAK og aðrir unnendur stangveiðinnar.

Þá erum við að fara í gang með okkar sívinsælu kastæfingar eftir langt hlé ! Styttist óðum í vorveiðina og líklega einhverjir sem vilja að taka nokkur æfingaköst innandyra við bestu aðstæður. Æfingarnar eru ætlaðar fullorðnum sem og börnum, vönum sem óvönum og er þátttakendum að kostnaðarlaus. Bara mæta með stöngina. Leiðbeinendur verða á staðnum. Æskilegt er að þeir sem ætla að mæta skrái þátttöku með því að senda póst á svak@svak.is svo við höfum smá hugmynd um hve margir mæta.

Æfingarnar verða sem hér segir:

Laugardagur 19.mars kl 12-14 í Íþróttahúsinu Hrafnagili

Laugardagur 2.apríl kl 12-14 í Íþróttahúsinu Hrafnagili

Frítt í sund á eftir fyrir þá sem vilja.

Sjáumst hress

Stjórn SVAK

Fjarðará í Ólafsfirði oftast nefnd Ólafsfjarðará fer í forsölu til félagsmanna SVAK  þriðjudaginn 1.mars kl 20 og stendur til 8.mars.

SVAK er leigutaki árinnar ásamt Veiðifélaginu Flugunni og skipta félögin jafnt með sér dögum,hvort félag með eina viku í senn. 

Veitt er frá 15.júlí til 20 september.

Ólafsfjarðará er fjögurra stanga á þar sem veitt er á tvær stangir á efra svæði fyrri vaktina og á neðra svæði seinni vaktina og öfugt. Svæðaskipti eru á vaktaskiptum. 

Veitt er á flugu og maðk. Í ánni veiðist aðallega sjóbleikja, en alltaf eitthvað af urriða og einn og einn lax.

Í verndunarskyni hefur SVAK sett bleikjukvóta í ánni niður í 5 bleikjur á stöng per vakt. Eftir að kvóta hefur verið náð skal sleppa allri bleikju.

Stjórn SVAK beinir einnig þeim tilmælum til veiðimanna sinna og sleppa allri bleikju sem er 50 sm eða stærri.

Í rafræna veiðibók SVAK voru skráðar 431 bleikja síðast liðið sumar sem er umtalsverð auking frá fyrri sumrum.

Sem fyrr fá félagsmenn SVAK 20 % afslátt af veiðileyfum í Ólafsfjarðará. 

Með von um ánægjulegar stundir á bakkanum.

Stjórnin

Ágætu félagar.

 Það fer óðum að styttast í forsölu Ólafsfjarðarár. Covid verið að stríða okkur þar eins og annarsstaðar. Við munum að sjálfsögðu auglýsa hana með nokkurra daga fyrirvara og senda póst á félagsmenn sem og að setja upplýsingar á heimasíðu og Fjésbókarsíðu SVAK.

Ólafsfjarðará stóð sig með mikilli prýði s.l sumar ef tekið er mið að árunum á undan með 431 skráðri bleikju í veiðibók SVAK.