Í Eyjafirði

Veiðisvæði Hörgár nær efst frá Nautá við Bakkasel í Öxnadal og Básfossi í Hörgádal og niður að ósum Hörgár sem er á milli jarðanna Skipalóns og Óss. Upptök Öxnadalsár eru í s.k. Þorbjarnartungum framan við Seldal og Almenning. Seldalsá verður að Öxnadalsá við Bakkasel sem er eyðibýli austan við Öxnadalsheiði. Í Hörgárdal eru upptökin á Hjaltadalsheiði, en áin er talin fisklaus framan við Básfoss sem er ófær fiskum. Básfoss liggur á milli bæjanna Flögu og Myrkárbakka. Öxnadalsá rennur í Hörgá rétt utan við Staðartungu. Í árnar renna margar hliðarár úr hliðardölum og skörðum. Þær helstu Öxnadalsmegin eru Vaská rétt utan við Bakkasel, Þverá utan við Hóla og Bægisá rétt framan við Bægisárhyl. Hörgárdalsmegin eru Myrká og Barká stærstu hliðarárnar. Barká er jökulsá úr Barkárdalsjökli og nær oft að lita Hörgá hressilega. Utan við Staðartungu eru stærstu hliðarárnar Fossá að austan og Syðri- og Ytri-Tunguár að vestan. Hörgá er dæmigerð dragá, köld með breytilegu vatnsmagni og oft jökullituð á sumrin. Hún er þriðja stærsta áin sem rennur í Eyjafjörð á eftir Eyjafjarðará og Fnjóská.

Kynþroska sjóbleikja fer að ganga í Hörgá í júlí og þær sem ganga lengst fram í dalina koma fyrstar en bleikjan hrygnir annars um alla á. Þegar líður á sumarið fara göngur vaxandi og ná hámarki í ágúst. Algeng þyngd kynþroska sjóbleikju er um 0,5 – 1,0 kg en þær þyngstu eru um 3 kg. Bleikjan gengur langt fram fyrir Bakkasel í Öxnadal, að Básfossi í Hörgárdal og að Byrgisfossi í Myrká sem er neðstur þriggja fossa í mynni Myrkárdals. Í lok ágúst og frameftir hausti gengur ókynþroska smábleikja í Hörgá, oft í stórum torfum. Í Öxnadalsá er einnig dvergvaxin bleikja steingrá að lit.
Hún er talin koma úr Þverbrekkuvatni og Hraunsvatni í Öxnadal. Á árum áður var veiddur staðbundinn silungur í Myrká ofan fossa en ekki er vitað um veiðitilraunir á undanförnum árum. Á undaförnum árum hefur hlutur urriða og sjóbirtings verið aukast í veiðinni og þeir eru að veiðast ofar á vatnasvæðinu, sérstaklega fram í Öxnadal.  Þessar tegundir eru þó algengastar neðst í Hörgá, frá Steðji og út eftir. Oft er mikið af smáurriða í kílum og sundum og fyrri hluta sumars leitar stórurriðinn þangað inn í ætisleit. Til er saga um urriða sem veiddist í Neskíl í landi Möðruvalla sem var með stálpaðan spóaunga í maganum og vó urriðinn sjálfur þó ekki meira en eitt kg. Þyngstu urriðarnir sem veiðast eru um 3 kíló en stærsti skráði sjóbirtingurinn (2011) var 5 kg.

Fyrr á árum voru gerðar tilraunir til þess að rækta upp laxastofn í Hörgá en þær skiluðu ekki árangri. Einungis örfáir laxar veiðast á hverju ári. Fiskrækt hefur ekki verið stunduð í áratugi en reynt er að stemma stigu við sel, mink og veiðiþjófum með veiðum og eftirliti í samstarfi við sveitarfélögin.




 



Veiðisvæði:

Svæði 1 nær frá Hörgárósum að Votahvammi að austan sem er á móti Hesthólma að vestan. Þetta er frekar stutt svæði með kílum, sundum og lygnum breiðum þar sem víða er veiðivon. Mest er veitt austan ár við ósinn, í Skipalónshyl og á breiðunni við Votahvamm. Á vorin er möguleiki á að ná björtum niðurgöngufiski og vænum urriða. Á haustin er oft mikið af geldfiski t.d. á Votahvammsbreiðu. Lausir dagar

  

Svæði 2 nær að austan upp að Stekkjarhól í landi Djúpárbakka sem er á móts við bæinn Litla Dunhaga að vestan. Svæðið er ekki ósvipað svæði 1 en veiði hefur farið minnkandi undanfarin ár. Helstu veiðistaðir eru rétt ofan við svæðamörk við Votahvamm, Gvendarstrengur í landi Möðruvalla, Brúahylur og Bjargnakílsós. Á Möðruvalla- og Hlaðnabökkum er þó víða veiðivon. Svæði 2 er besta urriðasvæði árinnar.  Lausir dagar

Svæði 3 nær upp að Syðri-Tunguá að vestan og að Steðja að austan. Hér breytist áin talsvert á hverju ári og ekki alltaf hægt að ganga að veiðistöðum vísum. Svæðið er engu að síður vinsælt og gefur oft mestu veiðina þegar upp er staðið. Helstu veiðistaðir eru við Dunhagakíl, Laugalandskvíslar, Þelamerkurbreiðu, Krossastaði, Ytri-Tunguárós og Steðja. Lausir dagar

Svæði 4a nær upp að ármótum Hörgár og Öxnadalsár. Þetta er langt svæði þar sem áin rennur um malareyrar í mörgum kvíslum sem breytast ár frá ári. Svæðið er þess vegna óútreiknanlegt en gefur stundum mjög mikla veiði. Aðalatriðið er að labba svæðið enda á milli og prófa álitlega staði. Það hentar því göngugörpum. Mest er veitt á svæðinu milli Lönguhlíðar og Skriðu. Einnig er veiðivon í brúarstrengnum við nýju brúna hjá Melum og með bökkum í kvísl sem liggur næst þjóðveginum að austan.  Lausir dagar

Svæði 4b er efsta svæðið Hörgárdalsmegin og nær upp að Básfossi. Barká rennur þarna í Hörgá við Bug og litar hana vel eins og fyrr segir. Þar fyrir ofan er áin oftast mjög tær. Neðarlega á svæðinu er Helguhylur sem er einn besti veiðistaður í allri ánni. Aðrir veiðistaðir eru við Skuggabrú hjá Bugi, bakkarnir á milli Gerðis og Þúfnavalla, Búðarnesbreiða og ármót Myrkár og Hörgár. Framan við Myrká rennur Hörgá í gili þar sem Básfoss er. Á því svæði er mikið af seiðum (afætum) sem gera veiðar erfiðar þótt vissulega sé hægt að næla þar í göngubleikju.  Lausir dagar

Svæði 5a er neðri hluti Öxnadalsár og nær frá ármótum að Jónasarlundi. Á þessu svæði er eftirsóttasti veiðistaður árinnar sem er Bægisárhylur. Hylurinn er neðan við foss sem er ekki alltaf fær göngufiskum. Þess vegna safnast þar mikið magn af silungi sem bíður færis að halda áfram göngu sinni. Þegar líður fram á haustið vill einnig safnast þar smábleikja. Algengt er að veiðimenn eyði öllum tíma sínum í Bægisárhyl og þess vegna er lítið rennt annars staðar þrátt fyrir að fisk sé að finna mun víðar á svæðinu. Fyrir neðan Bægisárhyl er röð af smáum en veiðlegum stöðum þar sem hægt er að hitta á göngufisk. Þar er þó oft mikið af staðbundnum smásilungi og seiðum sem trufla veiðar. Efsti veiðistaðurinn er við norðurhornið á Jónasarlundi. Annars er mesta veiðivonin á milli bæjanna Steinsstaða II og Neðstalands á breiðum og í vikum.  Lausir dagar

Svæði 5b er efra veiðisvæði Öxnadalsár og nær fram í Bakkasel að Nautá sem er lækur sem kemur ofan af Öxnadalsheiði. Síðan 2003 er eingöngu leyfð fluguveiði á þessu svæði enda býður það upp á marga frábæra fluguveiðistaði. Hvort þessi tihögun verður til frambúðar fer eftir undirtektum fluguveiðimanna. Svæðið er viðkvæmt og veiðin mjög misskipt á milli ára. Staðkunnugir telja að það sé vegna þess að fossinn ofan við Bægisárhyl getur verið ófær vikum saman og stoppað göngur. Neðsti veiðstaðurinn er Jónasarbreiða en þar fyrir ofan er Auðnahylur sem oft er fullur af stórum bleikjum sem taka ekki hvað sem er. Þarna er erfitt að athafna sig sökum dýpis og straumþunga. Stórar mikið þyngdar púpur eða straumflugur, t.d. Grey Ghost, með stóru hagli framan við öngulaugað eru nauðsynlegar til þess að hreyfa við fiskinum. Ef hann hrífst tekur hann fluguna með látum á brotinu fyrir neðan hylinn. Fyrir ofan Hraun eru margir álitlegir staðir en þeir helstu eru við Þverbrekku, Bessahlaðir og á milli Varmavatnshóla og Gloppu. Allt eru þetta eyðibýli sem eru þó vel merkt við þjóðveginn. Efstu veiðistaðirnir eru við ármót Vaskár.  Lausir dagar


 

   Veiðiskýrslur:
Skylt er að gera grein fyrir aflabrögðum í veiðibók á netinu, ATH - einnig þarf að skrá enga veiði (færa sem texta í athugasemdum). Allir sem skrá í veiðibókina eru með í potti þar sem dregnir verða út fimm veiðimenn í lok veiðitímans sem fá frítt veiðileyfi í Hörgá sumarið 2012.

Urriðinn í Hörgá

Á síðustu þremur árum hefur orðið ótrúleg hröð breyting á tegundasamsetningu veiðinnar í Hörgá. Áður fyrr var hlutfall urriða yfirleitt innan við 10% af heildarveiðinni en frá 2009 verður stökkbreyting og 2011 er fjórðungur veiðinnar urriði. Er svo komið að fleiri urriðar en bleikjur veiðast á vissum svæðum. Þegar rýnt er í veiðitölur frá 2011 er hlutfall urriða af heildarveiði mjög breytilegt eftir veiðisvæðum eins og sést á meðfylgjandi súluriti. Hæst er hlutfallið á svæði 2 eða yfir 50%  en lægst á efstu veiðisvæðunum 4b og 5b eða vel undir 10%. Samkvæmt veiðibókinni er þetta mest staðbundinn urriði en sjógenginn urriði (sjóbirtingur) er einnig að aukast í veiðinni og urriðinn færir sig stöðugt ofar í ána. Hlutfall sjóbirtings af heildarveiði var hæst á svæði 3 og stærstu fiskarnir sem veiddust árið 2011 voru sjóbirtingar (4 og 5 kg). Stærstu staðbundnu urriðarnir eru hins vegar um 3 kg.

 

Mesta urriðaveiðin er í Brúarhylnum við gömlu Hörgárbrúna á Ólafsfjarðarvegi á svæði 2. Þar er smáurriðinn yfirleitt við vestari brúarstólpann en stóri urriðinn liggur talsvert utar (austar) þar í strengnum rétt sunnan við brúna. Þetta er skemmtilegur straumflugustaður en það þarf að sökkva flugunni vel, helst með sökklínu og takan þar fer ekkert framhjá manni.  Aðrir sterkir urriðastaðir í Hörgá eru Ytri G-strengur á svæði 3 og svæðið frá Jónasarlundi að Neðstalandi í Öxnadal á svæði 5a.

Það sem er gott við Hörgárurriðann er að hann fúlsar ekkert við bleikjuflugum eins og Heimasætu, bleikum Nobbler og Dýrbít eða Mýslu.  Sömuleiðis má segja um maðkinn og bleiku Lympuna sem urriðinn hikar ekki við að taka. Annars hefur undirrituðum gengið vel að ná stórum urriðum í Hörgá á gular straumflugur eins og Þingeying. Á meðfylgjandi mynd er dæmigerður 60 sentímetra Hörgárurriði sem tók heiðgulan lítinn Nobbler á Möðruvallabökkum 29. júní sl.  Var honum sleppt að lokinni myndatöku. Þá glímdi undirritaður lengi við stóran og nýrunninn sjóbirting neðarlega í Brúarhylnum 1. ágúst sl áður en hann reif sig lausan. Hann tók Peacock púpu og var á að giska 6 pund. Þá rifjaðist líka upp að fyrir nokkrum árum síðan náði sami veiðimaður 1. ágúst, á nákvæmlega sama stað 7 punda nýjum sjóbirtingi. Nýlega er síðan búið að skrá 9 punda sjóbirting á svæði 2 sem náðist 7. ágúst á Hlaðnabökkum. Hann var veiddur á maðk. Gaman væri ef Hörgárveiðimenn ættu góðar myndir af stórum sjóbirtingi til að deila með okkur á þessari síðu.

ÞS

 

Kort: Hægt er að smella á kortin til að stækka þau.

 

 

 

 

Ábendingar BHA