Staðsetning: Fjörður er samheiti yfir dalina sem ganga upp af Þorgeirsfirði og Hvalvatnsfirði en það eru nyrstu firðirnir á skaganum á milli Eyjafjarðar og Skjálfandaflóa.

Í Fjörðum falla tvær bleikjuár til sjávar, annarsvegar Gilsá sem heitir Fjarðará síðasta spölinn áður en hún fellur í Hvalvatnsfjörð og hinsvegar Hólsá í Þorgeirsfirði.

Til einföldunar er hér yfirleytt talað um Fjarðará sem samheiti yfir þessi veiðisvæði þar sem mesta veiðin er yfirleytt skráð þar.

 
Aðgengi: Til að komast í Fjörður er ekið út Eyjafjörð að austan í áttina að Grenivík. Skömmu áður en komið er að kauptúninu er beygt upp með Gljúfurá (c.a. 20 mínútu akstur frá Akureyri) og ekið þaðan yfir Leirdalsheiði og niður í Hvalvatnsfjörð.

Áin er fiskgeng að fossi við eyðibýlið Gil. Fyrir neðan fossinn er stór hylur og fyrir kemur að bleikja veiðist í honum. Að Gili eru 18 km frá afleggjaranum við Gljúfurá. Frá Gili eru svo um 8 km til sjávar við Kaðalstaðakamb, en þar eru aflahæstu veiðistaðir á svæðinu, þ.e.a.s. ósasvæðið við Fjarðará. Það má gera ráð fyrir allavega 45 mín akstri frá þjóðveginum niður að ós Fjarðarár, fer allt eftir aðstæðum. En vegurinn er ekki gerður fyrir fólksbíla.

Vegurinn er yfirleytt ekki opnaður fyrr en um mánaðarmótin júní-júlí og vissara að fara inn á vef Vegagerðarinnar www.vegagerdin.is til að kanna aðstæður, sérstaklega ef menn eru á ferðinni snemmsumars.

 
Leyfilegt agn: Allt leyfilegt agn (maðkur, fluga og spúnn) er leyft á svæðinu.

 
Veiði: Sjóbleikja er í Fjarðará og er algeng stærð frá 1-2,5 pund. Einstaka sinnum veiðast lax og sjóbirtingar á svæðinu, en uppistaðan í veiðinni er sjóbleikja. Bleikjuveiðin sveiflast eftir árum eins og gengur, en undanfarin ár hefur byrjast að veiðast sjóbleikja á ósasvæðinu seinnipartinn í júlí.

Flugan er sterk um alla á, á ósasvæðinu eru kúluhausar og þurrflugur að virka vel, en á efri svæðunum koma straumflugurnar sterkari inn. Spúnninn er helst notaður á ósasvæðinu og jafnvel út við sjó, þá eru þyrluspúnar að virka vel, t.d. Finnska Lippan. Maðkurinn er sterkur í efri hluta árinnar, í beygjum og pittum þar sem fiskurinn getur legið.

 
Fyrirkomulag: Seldar eru 4 stangir á dag sem gilda á öllu svæðinu. Veiðitími er frjáls frá kl.06:00 -24:00

Heimildir: Lýsing tekin að hluta úr Stangveiðihandbókinni 3. bindi, birt með góðfúslegu leyfi höfundar.